عن الجام والروميو

ناس كتير قالولي ليه معندكش بروفايل على الجام او الروميو وانا كنت طول الوقت حاسس انها وسيلة سهلة لمجرد تلبية رغبة جنسية بحته مش اكتر ولكن انا اللي بفكر فيه اكتر من مجرد صحبة جنسية لطيفة

قررت اني ادخل العالم ده واشوف فيه

واذ فجأة حسيت اني دخلت مول للمثليين وكل واحد مصنف نفسه بالطول والعرض والحجم ومرات السعر كمان وكمان مواصفات الشخص اللي يحب يكون معاه في صحبه جنسية مسلية

حسيت شوية اني مش عارف اتأقلم خالص مع الوضع ده حاولت اكلم ناس اتعرف عليهم بس المشكلة اني اصلاً ضد التصنيف والتأطير وقولبة الاشخاص بين الاقواس

قلت ما علينا يالا ألعب شوية تصنيف يمكن تظبط معاك يا واد

في البداية قلت اللعبة شروطها صعبة وانا قدها يعني لازم ابدأ بعمل شوية صور بورنو من العيار التقيل علشان تجيب ناس وده استمر لمده 3 ايام ومقلكوش كمية الناس بقى كتيييييييييير

بعد كده قلت لالالالا ده رخص زيادة عن اللزوم انا هاقلل البورنو حبتين وبعدها لما حد يطلب ابعتله وقل عدد الناس حبه بس بقى لسه في اهتمام وده استمر لمده 5 ايام

بعد كده قلت مستحيل انا مش سلعة وهارفض ده تماماً

حطيت صوري العادية، ايوا صوري مش صور لوشي محطوط عليه شريطة سودا او مقطوع
صورة فيها ملامحي وانا مبتسم صور فيها شكلي زي اي بني ادم طبيعي ماشي في الشارع

طبعاً مقلكوش على الناس محدش بيعبرني، طبعاً علشان مفيش صور لجسمي مفيش صور عريانة من الاخر مفيش بضاعة

وانا عمري ما ها احب اكون بضاعة الناس تتفرج عليها

مشكلتي في ان الجنس بالنسبة لي مش فعل جسدي بس بل هو فعل عقلي كمان وانا بحس بأن الجنس الفكري اعمق واحلى وممتع اكتر من  الجنس الجسدي فقط

مش معنى كده العلاقات الطويلة لأ انا قصدي ان الطرفين يقرروا يعملوا جنس وبس نقطة ومش من اول السطر

لان خلاص هي صفحة فيها سطر واحد

ممكن يكون في صفحة جديدة بس برضو صفحة بسطر واحد وكل سطر وله شروطه

مش عارف امتى ممكن افكر في علاقة تستمر لاكتر من سطر واكتر من صفحة

اكيد هايجي وقتها ف يوم من الايام

ما هي المشكلة موضوع التصنيف ده بجد مستفز

يعني اول ما ألاقي حد وابتدي افكر في نظرية السطور والصفحات على طول بلبس في موضوع التصنيف

هو احنا ليه منعرفش نعيش من غير تصيف وللأسف كلنا بنضايق منه مع اننا اكتر ناس بنمارسه على بعض

مش عايز اقول امثله على التصنيف لان لو محدش شايف انه بيصنف وبيحط الناس في قوالب وهو بيعمل ده فعلاً مفيش حاجة هاتقدر تغير وجهة نظره إلا لما هو يقتنع انه هو محتاج يغيرها

وانا بقى قررت ان كفاية مساعدة الناس على رؤية واحترام الاختلاف بهدف تظبيط ادمغة بعض المزز لأغراض مستقبلية

زهقت من كده وعايز بقى العب لعبه اكتشاف الذات اللي بقالي كتير بلعبها لوحدي مع حد تاني نلعبها مع بعض

ومش متهيألي الحد ده هايكون في الجام او الروميو

بس مش عارف اهو هاستنى ما انا عايشها انتظار جيت دلوقتي وزهقت

هاستنى وهاتبسط بأحلى فترة انتظار بعيشها في حياتي

بلاش غم الحياة مزة وانا بموت في المزز